प्रतीक्षा : स्व. व्यंकटेश देशमुख

ती पुस्तके निकामी, नापास त्या परीक्षा;

झोळीत चाक-यांची ज्या मागतील भिक्षा.

मी जन्म घेतल्याचा अपराध मान्य केला;

आयुष्य कंठण्याची केली कबूल शिक्षा.

कसलीच आसवांना प्रस्तावना जमेना;

कसलीच वेदनेची करता न ये समीक्षा.

स्वातंत्र्य सूर्य आला घेवून दोन गोष्टी;

हस्तांतरीत सत्ता भाषांतरीत दिक्षा.

आता परस्परांना डोळे मिटून पाहू;

ये,संपवू मुक्याने भेटीतली प्रतीक्षा.