श्रीराम गिरी
९७६३००४४९४
१. घाम थोडा
ऐक मित्रा बैस तू निष्काम थोडा;
तापलेला जीव घे आराम थोडा.
तोडला विश्वास तू माझा कितीदा ;
राह ना शब्दावरी तू ठाम थोडा.
मोल ना कष्टास येथे आज काही;
पाहिला मी गाळुनीही घाम थोडा.
समजुनी माझी जरा घेशील अडचण ;
हा मुळी बाकीच रे हंगाम थोडा.
माझिया छातीत गोळी झाडणार्‍या;
जाणतो मीही अरे इस्लाम थोडा.
सत्य केले सिद्ध माझ्या धोरणाने;
खंत नाही जाहलो बदनाम थोडा.
२.जाग
झाला पसार कोणी लावून आग येथे;
उपयोग काय त्याचा काढून माग येथे.
आम्हांस शौक भारी आहे कळ्या, फुलांचा ;
येणार फक्त सांगा कोठून बाग येथे.
होईल भस्म जेव्हा सृष्टीच तारकांची;
येईल माणसाला तेव्हाच जाग येथे.
जे पाहिजे तुम्हाला, द्यावे जगास आधी ;
जे वाटती फुलांना; त्यांचा पराग येथे.
ठेवा सुरूच चर्चा माझ्याच न्यूनतेची ;
ठेवा असाच तुमचा लपवून डाग येथे.
३.गुन्हा
हे दु:ख सांगणे रे मोठा गुन्हा जगाला ;
दावू नये कधीही जखमा अशा कुणाला.
ना भंगली कधीही माझी अभाळ स्वप्ने;
छाटून पाहिले तू माझ्या जरी पराला.
आमिष नवे गड्या तू शोधून काढ आता ;
ना लागणार त्याविन मासा तुझ्या गळाला.
ठाऊक रीत मजला चवचाल या जगाची;
नाठाळ माणसांचा देऊ नका हवाला.
पैशात तोलली तू नातीच काळजाची ;
देईल काय पैसा घरपण तुझ्या घराला.
४.उपहास
माझा यशाचा जेव्हा ध्यास सुरू झाला ;
माझा खरा तेव्हा वनवास सुरू झाला.
नुकतेच स्वप्नांचे विणले घरटे होते;
तू टाळण्याचा अन्‌ आभास सुरू झाला.
तलवार रक्ताने भिजताच महात्म्यांच्या;
तेव्हा खरा येथे इतिहास सुरू झाला.
छळती मला ऋतु का ? ह्या सलती का वाटा ?
मी जाणतो का हा उपहास सुरू झाला.
घेऊन तो फिरतो डोळ्यात विजा कसल्या ?
कसला गडे त्याचा अभ्यास सुरू झाला?
५. आकस
प्रेमाने जग पालटण्याचा मानस आहे ;
येशू अन्‌ बुद्धाचा मीही वारस आहे.
पुरता झालो माणूस न मी अजुनी येथे ;
हृदयी माझ्या अजुनी थोडा आकस आहे.
आहे व्यर्थच हे घाबरणे एकामेका ;
दडुनी अपुल्या आतच मोठा राक्षस आहे.
जाळी जो प्रतिभेला अन्‌ कर्तृत्वालाही ;
शत्रुहुनी शत्रू मोठा तो आळस आहे.
अद्याप कुठे लढलो मी साक्षात लढाई;
अद्याप कुठे कळले माझे साहस आहे.
कोणत्याही टिप्पण्‍या नाहीत:
टिप्पणी पोस्ट करा