माझ्या पुढे भविष्या जाण्या तुला मनाई

माझ्या पुढे भविष्या जाण्या तुला मनाई;
जर मीच संपलो तर कसली तुझी कमाई ?


येईल अमृताची तेव्हा जरूर गोडी,
गाळून घाम जेव्हा आम्ही करू मिठाई.


जीवन कलंदरीच्या इतक्या उनाड वाटा,
माझीच हाक मजला परतून येत जाई.


आता विरंगुळ्याला नुसता रवंथ उरला-
"आम्ही भल्याभल्यांची केली कशी धुलाई!"


येतील ध्येय लाखो पायात घुटमळाया;
वाटेत पापण्यांना जर अंथरेल बाई.


मोहा तुझ्या फुलांवर तेजाब शिंपडू का?
हा बाप बेवडा मज मागे नवीन आई.


हे राहिले असे तर होणार काय नाही?
मागेल आंधळ्यांना मग सूर्य रोशणाई.


- रविप्रकाश
९९२१२९७२९७