दोघातली कहाणी दोघात राहुदे;
मिटवून चांदण्यांचा अध्याय ठेवुदे.
मारूबिहाग अधुरा माझ्या-तुझ्यातला;
शहनाईच्या स्वरांना चुंबून घेउदे.
निर्गंध स्वस्तिकांचा मार्गी तुझ्या सडा;
माझ्या मुक्या फुलांना माघार घेउदे.
घायाळ पैंजणांना निष्ठूर का सजा?
गर्भार वेदनेला मेंदीत रंगुदे.
बेदर्द प्राक्तनाची ही घातकी तर्‍हा
बिनशर्त कुंकुमाला सौभाग्य कोरुदे.
दोघातली कहाणी दोघात राहुदे;
उध्वस्त एक गाथा अज्ञात राहुदे.
- उ.रा.गिरी
कोणत्याही टिप्पण्‍या नाहीत:
टिप्पणी पोस्ट करा