आहे जरी सभोती पेटून युद्ध माझ्या

आहे जरी सभोती पेटून युद्ध माझ्या;
मी ठेवतो तरीही प्राणात बुद्ध माझ्या.

बोलेन स्पष्ट मी अन् वागेन इष्ट आता;
हे विश्वही उभे मग ठाको विरुद्ध माझ्या.

ही जागवा स्मशाने, द्या पेटवून वारे;
हा ओघ वाहताहे रक्तात क्रुद्ध माझ्या.

आता जपून मीही एकेक श्वास घेतो;
नाही तशी हवाही गावात शुद्ध माझ्या.

ध्यानीमनी तरीही राहील जात माझी;
ते शोधतात हल्ली ओळी अशुद्ध माझ्या.

-सिद्धार्थ भगत
९८२२७१२३८०