ही नवी दु:खे : चंद्रशेखर सानेकर

ही नवी दु:खे जगाला सांगती दिनरात आता;

पाहिजे धन्वंतरी देवाहुनी निष्णात आता.

मी कसे विसरून गेलो मागचे संदर्भ काही?

बोल माझ्याशी जरा तू याच संदर्भात आता.

मारते आहे मला अवकाश त्या बाजूस हाका;

मी मला सोडून द्यावे कोणत्या विवरात आता?

कोणत्या वस्तीत होती साद मी तुजला दिलेली?

ऐकतो आहे तुझा प्रतिसाद मी विजनात आता.

आपला शत्रू खरे तर आपल्या पोटात आहे;

आपले आहेत जे जे तेच करती घात आता.