जिव्हाळा : समीर चव्हाण

दिवस जातो कसाही,रात्र जाता जात नाही;

कुणालाही विसरणे आपल्या हातात नाही.

कुणाला हृदय देणे आपल्या हातात नाही;

कसे सांगू तुला की प्रेम केले जात नाही.

न वा-याला,न ता-याला,न पर्वा चांदण्याला;

घना तू सांग माझा चंद्र का गगनात नाही.

जरी सुकली फुले,सरला जरी मधुमास तरिही;

असे होणार नाही गंध या विजनात नाही.

न उरली ओढ ती,नाहीच कोठे तो जिव्हाळा;

तसे ते प्रेम ही आता सये अपुल्यात नाही!

मो. ९७९३४७१७५१