Related Posts Plugin for WordPress, Blogger...

२७ सप्टेंबर, २००९

दोन गझला : डी.एन.गांगण



डी.एन गांगण
९३२३७९५९९६

१.आपण

किती खरे अन् किती झूट वावरतो आपण;
विनामुखवटे बहुरुपियाही बनतो आपण.

खरा चेहरा घेउनी कोणी हिंडत नाही;
स्वत: स्वत:चा बनुन तोतया फिरतो आपण.

दु:ख कशाला करावयाचे दुरून आता;
नात्यानेही तसे जवळचे नव्हतो आपण.

स्वप्नांमागुन स्वप्ने तुटती समोर अपुल्या;
तरी शेवटी स्वप्नांसाठी जगतो आपण

नश्वर आहे देह आपुला माहित असुनी,
अन् वरवरच्या रुपास बघुनी भुलतो आपण;

जीवन म्हणजे नाटक असते या जगण्याचे;
अन् “जन्माचे नाटक झाले” म्हणतो आपण.

सिध्द कराया मीही आहे एक असामी;
नको नको ते उपद्व्यापही करतो आपण.

कोण कुणाचा हेच पाहुनी मत देताना
स्वत्वहीन अन् तत्वहीनही बनतो आपण.

२.तार

( तरही गझल - जुल काफिया )

‘ मी त्या भल्या पहाटे लावून दार आले
हातात आसवांचा वाहून भार आले’
- सुलभा कामत

मी त्या भल्या पहाटे लावून दार आले;
हातात आसवांचा वाहून भार आले.

ज्यांच्यावरीच होता विश्वास ठेवला मी;
त्यांच्याच संगिनींचे झेलून वार आले.

जाऊ अता कशी मी, परतून त्या ठिकाणी...
टाळून ‘बाल्य’ माझे चालून फार आले.

सामील गाव झाला माझा यशात जेव्हा;
कोणी न आप्त माझे घेऊन हार आले.

मी दु:खही स्वत:चे नेले स्वत:बरोबर;
कोणावरी न माझा, टाकून भार आले.

‘निर्माल्य’ जीवनाचे, मृत्यूस वाहिले मी
शब्दांत फक्त एका, सांगून सार आले

बदसूर साज होता, जुळवूनही जुळेना
मी एवढयाचसाठी, तोडून तार आले.

गझलकडे वळा ! - भालचंद्र नेमाडे

‘‘सध्या मुक्तछंदाच्या वापराने मराठी कवितेला दारिद्र्य आले आहे. म्हणूनच एकाचवेळी विविध विषय समर्थपणे पोहोचवणा-या व वृत्तसौंदर्याने नटलेल्या गझल प्रकाराचा स्वीकार-अंगिकार मराठी भाषेला आवश्यकच ठरणार आहे’’ - असे उद्गार सुप्रसिद्ध साहित्यिक भालचंद्र नेमाडे यांनी मुंबई विद्यापीठात गझल प्रकारावर झालेल्या परिसंवादाच्या अध्यक्षपदावरून काढले. (वृत्त - महाराष्ट्र टाइम्स, दि.७-४-२००४)

Ghazal in English :


English
- Chandrani Chatterjee / Milind Malshe

डॉ.श्रीकृष्ण राऊत : गझल सादर करताना

तुझ्या गुलाबी ओठांवरती : रफिक शेख

नामवंत सिने दिग्दर्शक राजदत्तजी ‘गझलकार’ सीमोल्लंघन विशेषांकाबद्दल बोलताना :

प्रख्यात समाज सेविका सिंधुताई सपकाळ

प्रख्यात समाज सेविका सिंधुताई सपकाळ
सीमोल्लंघन २०११ चे प्रकाशन करताना

  © Blogger templates Newspaper III by Ourblogtemplates.com 2008

Back to TOP