Related Posts Plugin for WordPress, Blogger...

२३ ऑक्टोबर, २०१२

बदीऊज्जमा बिराजदार : तीन गझला




१.

स्वप्ने किती गुलाबी

स्वप्ने किती गुलाबी, सजवून रात गेली;
या फाटक्या जिवाला, फसवून रात गेली.

संमेलने स्मृतींची, आरास वेदनांची;
जळता अतीत माझे, उजळून रात गेली.

मिळते उसंत तेव्हा, शिवतो तमाम जखमा;
एकेक जखम माझी, उसवून रात गेली.

अख्खी सकाळ जाते, मी आवरीत बसलो;
क्षण विस्मृतीतलेही, पसरून रात गेली.

चुकते हरेक व्यक्ती, अपवाद कोण त्याला;
पण बोध त्यातुनी घे, वदवून रात गेली.

करतोस केवढी तू चिंता उगा उद्याची;
झोपेविनाच "साबिर" उलटून रात गेली.

२.

प्रेतास चूड नुसती

प्रेतास चूड नुसती लावून लोक गेले;
कर्तव्य पार त्यांचे पाडून लोक गेले.

भुरटेच चोर आता होवून साव आले;
त्यांची चुणूक मजला दावून लोक गेले.

केले न माफ माझ्या प्रेतासही जगाने;
टाळूवरील लोणी खाऊन लोक गेले.

माझ्यासमान नव्हता कोणीच कानफाटा;
आरोप नेहमीचे ठेवून लोक गेले.

रेंगाळला परंतू, ना थांबलाच “साबिर”;
दारास काल टाळा ठोकून लोक गेले.

३.

शब्द झाले दागिने

शब्द झाले दागिने, शृंगारली माझी गझल;
मैफिलींमध्ये पहा संचारली माझी गझल.

का मुखवट्यांनाच मानू लागलो मी चेहरे?
वाचताना चेहरे अंधारली माझी गझल.

शुष्क झाली माणसे अन् कोरड्या झाल्या दिशा;
याच दृष्याने किती ओसाडली माझी गझल.

पाहिले अश्रू, कधी तर, ऎकले मी हुंदके;
ते टिपायाला पुढे झेपावली माझी गझल.

कागदी गझला परंतू बोलबाला केवढा!
सांगतो इतकेच की, बेजारली माझी गझल.

पैंजणे घालून माझी गझल नाचू लागली;
तोच त्यांनी का अशी धुत्कारली माझी गझल?

स्वप्न गझलेचे पहाता प्राण “साबिर” सोडला;
ते समाधी बांधता, साकारली माझी गझल.


गझलकडे वळा ! - भालचंद्र नेमाडे

‘‘सध्या मुक्तछंदाच्या वापराने मराठी कवितेला दारिद्र्य आले आहे. म्हणूनच एकाचवेळी विविध विषय समर्थपणे पोहोचवणा-या व वृत्तसौंदर्याने नटलेल्या गझल प्रकाराचा स्वीकार-अंगिकार मराठी भाषेला आवश्यकच ठरणार आहे’’ - असे उद्गार सुप्रसिद्ध साहित्यिक भालचंद्र नेमाडे यांनी मुंबई विद्यापीठात गझल प्रकारावर झालेल्या परिसंवादाच्या अध्यक्षपदावरून काढले. (वृत्त - महाराष्ट्र टाइम्स, दि.७-४-२००४)

Ghazal in English :


English
- Chandrani Chatterjee / Milind Malshe

डॉ.श्रीकृष्ण राऊत : गझल सादर करताना

तुझ्या गुलाबी ओठांवरती : रफिक शेख

नामवंत सिने दिग्दर्शक राजदत्तजी ‘गझलकार’ सीमोल्लंघन विशेषांकाबद्दल बोलताना :

प्रख्यात समाज सेविका सिंधुताई सपकाळ

प्रख्यात समाज सेविका सिंधुताई सपकाळ
सीमोल्लंघन २०११ चे प्रकाशन करताना

  © Blogger templates Newspaper III by Ourblogtemplates.com 2008

Back to TOP