Related Posts Plugin for WordPress, Blogger...

२३ ऑक्टोबर, २०१२

जनार्दन म्हात्रे : दोन गझला



१.

विरंगुळा ना पूर्वीइतुका मिळतो आता;
दिवस उगवत्या व्यापांमध्ये ढळतो आता.

कुणी न समजून कधी घेतले मनास माझ्या;
तुला तरी मी सांग कितीसा कळतो आता.

गत स्मृतींची मनात दाटी-दाटी होते;
श्रावण या पापण्यात गच्च तरळतो आता.

तुझ्या मनाची खंत बावरी मुळीच नाही;
भेटण्यास आतुर मीही तळमळतो आता.

एक असुनही मनात हे अंतर का पडले?
का विरहाच्या उन्हात दोघे जळतो आता.

क्षणांमुळे ज्या आयुष्यच हे ढवळून गेले;
काय बिनसले शोधत मी घुटमळतो आता.

बागडण्याचे दिवस संपले कायमचे अन;
कर्तव्याची दु:खे रोजच दळतो आता.

२.

खरे बोलतो...तुला खरे का वाटत नाही;
गझल कधीही खोटे काही सांगत नाही.

जरूर या नजरेत आर्जवी ओढ असावी;
उगीच मन हे असे कुणावर भाळत नाही.

आपुलकीने घट्ट मुलामा दे प्रेमाचा;
त्यावाचुन हे तुटलेले मन सांधत नाही.

गजबजलेली दु:खे माझ्या झोळीमध्ये;
तरी सुखाचे दान कुणा मी मागत नाही.

नको अशी पापण्यांत दडवून ठेवू स्वप्ने;
भिजल्यानंतर अर्थ कशाचा लागत नाही.

जगण्यावर दु:खाचे हे उपकार म्हणावे;
सुख कोणाचे कधी एकटे नांदत नाही.

जरी वाटतो शेवट...हा प्रारंभच आहे;
आयुष्याचा प्रवास वळतो...थांबत नाही!













गझलकडे वळा ! - भालचंद्र नेमाडे

‘‘सध्या मुक्तछंदाच्या वापराने मराठी कवितेला दारिद्र्य आले आहे. म्हणूनच एकाचवेळी विविध विषय समर्थपणे पोहोचवणा-या व वृत्तसौंदर्याने नटलेल्या गझल प्रकाराचा स्वीकार-अंगिकार मराठी भाषेला आवश्यकच ठरणार आहे’’ - असे उद्गार सुप्रसिद्ध साहित्यिक भालचंद्र नेमाडे यांनी मुंबई विद्यापीठात गझल प्रकारावर झालेल्या परिसंवादाच्या अध्यक्षपदावरून काढले. (वृत्त - महाराष्ट्र टाइम्स, दि.७-४-२००४)

Ghazal in English :


English
- Chandrani Chatterjee / Milind Malshe

डॉ.श्रीकृष्ण राऊत : गझल सादर करताना

तुझ्या गुलाबी ओठांवरती : रफिक शेख

नामवंत सिने दिग्दर्शक राजदत्तजी ‘गझलकार’ सीमोल्लंघन विशेषांकाबद्दल बोलताना :

प्रख्यात समाज सेविका सिंधुताई सपकाळ

प्रख्यात समाज सेविका सिंधुताई सपकाळ
सीमोल्लंघन २०११ चे प्रकाशन करताना

  © Blogger templates Newspaper III by Ourblogtemplates.com 2008

Back to TOP