Related Posts Plugin for WordPress, Blogger...

२३ ऑक्टोबर, २०१२

मसूद पटेल : तीन गझला




१.

मोसम

पाहून मोसमाची बेमान रीत आता;
विसरून पार गेलो पाऊस गीत आता.

व्यवहार पोसणार्‍या शहरात एक वेडा;
फिरतोय शोधण्या बघ निर्व्याज प्रीत आता.

जगण्यात रोज मेली ही जिंदगी अशी की
मरणास ही खर्‍या मी नांहीच भीत आता.

सुख एक दूर जाता आली अनेक दुखे:
माझ्या सवे रहाया या झोपडीत आता.

आजन्म ओढ होती ज्याची तुला उन्हा रे;
उरला न गारवा तो या सावलीत आता.

अडवू नको किनार्‍या तू वाट आज माझी;
घेण्यास मी निघालो वादळ मिठीत आता.

२.

विसावा

या तुच्छ जीवनाला इतकाच वर मिळावा;
सेवेत शोषितांच्या बस देह हा झिजावा.

निर्व्याज ती नजर दे डोळ्यास मज अशी की
भगवा, निळा नि हिरवा मज सारखा दिसावा.

जग दूरचे खरोखर दारी जरूर आले;
पण आपसी दुरावा केव्हां इथे मिटावा?

वस्ती गरीब कोणी जर जाळलीच नाहीं;
मग धूर सारखा हा तेथून कां निघावा?

जमलेत आप्त सारे छळन्या मला इथेही;
सरणावरी जरा मी जो घेतला विसावा.

३.

शेवटी-शेवटी

हट्ट सोडून दे शेवटी शेवटी;
नाखुशीनेच ये शेवटी शेवटी.

पोळल्यावर सखे दुष्ट शहरी तुझ्या;
गाव मज आठवे शेवटी शेवटी.

अंतरी नेमका मीच होतो तुझ्या;
तू जरी जाणले शेवटी शेवटी.

दावण्या या जगी मी खरा चेहरा;
मुखवटे काढले शेवटी शेवटी.

जिंकुनी वादळे मी बुडालो खरा;
या किनारी गडे शेवटी शेवटी.

पाहुनी रूप मी या जगाचे खरे;
तत्व गुंडाळले शेवटी शेवटी.

बोलणे सत्य माझे सदा जीवनी;
यार ठरले गुन्हे शेवटी शेवटी.

या प्रवासात मज सोबती राहिले;
फक्त रस्तेच हे शेवटी शेवटी.

लोक आतूर असता गझल ऐकण्या;
संपले शब्द हे शेवटी शेवटी.


गझलकडे वळा ! - भालचंद्र नेमाडे

‘‘सध्या मुक्तछंदाच्या वापराने मराठी कवितेला दारिद्र्य आले आहे. म्हणूनच एकाचवेळी विविध विषय समर्थपणे पोहोचवणा-या व वृत्तसौंदर्याने नटलेल्या गझल प्रकाराचा स्वीकार-अंगिकार मराठी भाषेला आवश्यकच ठरणार आहे’’ - असे उद्गार सुप्रसिद्ध साहित्यिक भालचंद्र नेमाडे यांनी मुंबई विद्यापीठात गझल प्रकारावर झालेल्या परिसंवादाच्या अध्यक्षपदावरून काढले. (वृत्त - महाराष्ट्र टाइम्स, दि.७-४-२००४)

Ghazal in English :


English
- Chandrani Chatterjee / Milind Malshe

डॉ.श्रीकृष्ण राऊत : गझल सादर करताना

तुझ्या गुलाबी ओठांवरती : रफिक शेख

नामवंत सिने दिग्दर्शक राजदत्तजी ‘गझलकार’ सीमोल्लंघन विशेषांकाबद्दल बोलताना :

प्रख्यात समाज सेविका सिंधुताई सपकाळ

प्रख्यात समाज सेविका सिंधुताई सपकाळ
सीमोल्लंघन २०११ चे प्रकाशन करताना

  © Blogger templates Newspaper III by Ourblogtemplates.com 2008

Back to TOP